Ibuprofen yaba igira uruhare mu gutera ubugumba ku bagabo

Ubushakashatsi bwakozwe n’abahanga mu bijyanye n’imiti, bwagaragaje ko kunywa umuti ugabanya ububabare uzwi nka Ibuprofen igihe kirekire, bishobora kugira ingaruka zirimo n’ubugumba ku bagabo.

Ubu bushakashatsi bwakozwe n’itsinda ry’abashakashatsi bo mu Bufaransa na Denmark, buri muri gahunda ndende yo gusuzuma ingaruka imiti ya Ibuprofen, Paracetamol na Aspirin ikunze gukoreshwa cyane hirya no hino ku Isi bigira ku buzima bw’umugore utwite.

Bernard Jégou, umwe mu banditsi bakuru b’ibyavuye muri ubu bushakashatsi mu kigo National Institute of Health and Medical Research, yavuze ko mu kubukora bifashishije abagabo 31 bafite hagati y’imyaka 18-35.

Muri abo, 14 bahawe imiti ingana n’ifatwa n’abantu bakora siporo cyane barimo abakinnyi b’umupira, ni ukuvuga miligarama 600 ku munsi.

Nk’uko The Guardian dukesha iyi nkuru yabyanditse, nyuma y’ibyumweru bitandatu iki gikorwa cyamaze, basanze uyu muti waragaharitse ikorwa ry’imisemburo igira iruhare mu mikurire n’imikorere y’imyanya myibarukiro, bigaragaza ko udusabo tw’intanga tutagikora neza.

Iki kibazo kizwi nka ‘compensated hypogonadism’, ubusanzwe gikunze kugaragara ku bantu bageze mu zabukuru cyangwa abanywi b’itabi.

David Møbjerg Kristensen wo muri Kaminuza ya Copenhagen muri Denmark nawe wagize uruhare muri ubu bushakashatsi yagaragaje ko nubwo ibyabaye ku bakoreweho ubushakashatsi byari mu gihe gito, bafite impungenge ko abakoresha Ibuprofen cyane bashobora kugerwaho n’ingaruka z’igihe kirekire.

Ati “Impungenge zacu ziri ku byerekeye kubyara kw’abagabo bakoresha uyu muti igihe kirekire. Iyi miti igabanya ububabare, ariko hari abantu bayikoresha batabanje kuyifata nk’umuti ukomeye.”

Ibi bivuzwe mu gihe mu minsi ishize abashakashatsi batahwemye kugaragaza ibibazo Ibuprofen ishobora guteza birimo indwara z’umutima, ndetse no gukuramo inda ku bagore batwite, cyangwa bakabyara abana bafite ubumuga butandukanye.

TANGA IGITEKEREZO CYAWE

Please enter your comment!
Please enter your name here